Dritarja e kërkimit

Matiu 14

Tisaputu Yowan Yo Irriu Di Tooltool I, In Gurini

(Maka 6:14-29; Luka 9:7-9)

1Ye kene tani in Erot Andepas yo iyei tool kuto mai a matan kala tana mai ke Galili i, in ilongo bingi ke Yesu ye urata maimai yo iyei nga, 2le nga iwete pang di kapraingi ki. Iyei ne, “Ai, tool ni o Yowan yo irriu di tooltool, in pa oo. Ya tani la o imadit mulu ye ni ke matenge i, ngan la le gurana ki mai san ke be iyei gogo mos ye nga.”

3Erot tani, in muku ngan iwete le di tooltool ki tikaua Yowan a tipauu, motong la titaru lo rumu dook tiap kidi talnga dikidiki lono, yesoo Yowan ipasak panga ye yo iyooloo toonoo Pilip rimana yo Erodias in nga. 4Ye kene tani in Yowan iwete pang Erot nen, “Ong i nga kopsap ye ger ye yo kuyooloo garup in nga.” 5Ngan nen le Erot lono mai san be iraumata Yowan a imata, bong itattadai di tooltool ke Yuda, yesoo di ngan tikamata Yowan ben ya in Maro koonoo atu.

6Tiyepe, tiyepe, le tilo ye kene yo be lodi tut ye lal yo Erot tinana ipasuiu ye i, motong la iyeie kanningi maiyoko atu be tikanen ye lal tani in. Inbe ye kene tani in Erodias natunu garup, in man iki la di tooltool maimai tina matadi, le Erot ikamata ngan lon ponana ye mai san. 7Le nga Erot ipamede betanga ki pang garup kase tani nen, “Awete pong moolmool le ete nen. Soo so yo lom panga mai mata i, in kuweta, ngan ole akauu pong.”

8Motong la garup kase tani la itoro tinana ye so yo be Erot ikauu panga i, ngan tinana iwete panga ye Yowan yo irriu di tooltool in kutono. Le nga itoo tinana koonoo a imulu la iwete pang Erot nen, “Lok be kukurutu Yowan yo irriu di tooltool, in gurini, inbe kunono kutono lo ye tawiri atu a kouu pau nookoot nga.”

9Ngan tool kuto mai tani in ilongo betanga ke garup kase tani ngan lon moo ye dook. Bong ngan ipamede betanga medana a iwete moolmool le ete la di diene tina yo iye di tikan so, ngan matadi oo, le nga iwete be tikaua so yo garup kase tani iwete ye, in panga. 10Ngan nen le iwanga di tooltool ki yo be matadi kala nga, ngan tilo rumu kidi talnga dikidiki lono a lo tisaputu Yowan tani in gurini. 11Motong la tikaua kutono a tinona lo tawiri lono, inbe tikauu pang garup kase tani a ikauu lo ikauu pang tinana. 12Motong la Yowan di galiunu tilongo bingi ki yo imata koot nga, le nga timan man tikaua bobono a la tikelmaii. Motong la tila la tikaua bingi ye pang Yesu nga.

Yesu Ipakan Di Tooltool Alunu Ben 5,000

(Maka 6:30-44; Luka 9:10-17; Yowan 6:1-14)

13Ye kene tani in Yesu ilongo bingi ke Yowan yo imata nga, motong la iyege malala tani, inbe ipasnaka panga le du iyiri ye ookoo atu a ila pang ye ni balim koonoo atu. Bong di tooltool alunu tilongo bingi ke Yesu yo ila nga, motong la tiyege malala kidi, inbe tipa tana a titoo a tila. 14Le nga ye kene yo la ookoo ki isolo tana ye in nga, ngan Yesu ikamata di tooltool malala mai tina yo tiyepe nga. Ngan nen le ya in lono pang di, le nga ikarata di a matamatenge kidi imot, inbe tinidi dook mata mulu. 15Tiyepe ye ni tani in a du rrai, motong la Yesu di galiunu timan tiwete panga nen, “Ai, ni yo tayepe ye i, i ni balim koonoo, inbe nga rrai oo. Le kuwete pang di tooltool nga a tila pang ye malala kapala, a be nen ngan la di tapdi tiyimi kaningi yo be tikan nga.”

16Motong la Yesu iraua betanga kidi nen, “Di tooltool nga o ke be tila tiap. Ole ang tapmim kakap kaningi pang di a tikan.”

17Ngan di galiunu tiwete panga nen, “Ona tiap! Am nga porong kiam nga dukumu limi, inbe i paranga kiam nga ru leu.”

18Motong la Yesu iwete pang di nen, “Kakap porong le i ngan man yau.” 19Inbe iwete pang di tooltool malala mai tina be du tiwur dingding pono. Motong la ikap porong dukumu limi ipa ye i ru tina, inbe itada pang lang katene a iwete lo ponana ki pang Maro ye. Motong la itepalapala a isuket pang di galiunu be timalimi di tooltool tina ye a tikan. 20Ngan di tooltool tina ngan di le imot tikan tikan le lo kapodi sung dook. Motong la di galiunu tiwinoko kaningi naunu naunu tina yo tiwulai nga, ngan le tipadid ye karei sangaul be ru le lo ipon. 21Ngan kinkatingi kidi tooltool yo tikan so nga, ngan di tamoto leu ngan ben 5,000. Bong di garup le kakase kidi yo tiye di tikan so nga, ngan tikinkat di tiap.

Yesu Ipa Ran Pono

(Maka 6:45-52; Yowan 6:15-21)

22Tikan so a imot, motong la Yesu ipakaikai di galiunu be tisuku ookoo kidi, a be nen ngan tipie a timuku pang ran koonoo kapala. E ya taunu in be sila iyepe a itar di tooltool tina a tila pang malala kidi kidi ngan. 23Itar di a tila, motong la ya taleu inau a ilo pang kawal be lo ipatarau. Ngan ke be idu iyara a be ni burrum, ngan Yesu ya taleu iyepe la kawal ngo. 24E di galiunu tina ngan tipie a tila ke ran kataunu ni, a manga mooloo ye tana oo. Bong eng ipakala di ke dama le nga tirookoorookoo kokor maimai dook.

25Ngan Yesu iyepe kawal le lo pang malama, motong la idu a ipa ran pono pang ye di a ila. 26Ipa a ila potai pang ye di, motong la tikamata yo ipa ran pono a be ila pang ye di nga. Le nga titattadai a titangarur, inbe tisulu. Tiyei ne, “Ai, nisene atu la iman pang yidi i!”

27Bong palbe leu be Yesu koonoo pang di nen, “Katattadai be! I au tani naii. Kin lomim mede leu.”

28Motong la Pita iwete panga nen, “Tool Mai, be in ong moolmool nga, ngan kuwete le apa ran pono a amala pang yong.”

29Ngan Yesu iyei ne, “Oo, nen ngan kuman.” Motong la Pita ipas a iyege ookoo, inbe idu ipa ran pono a ila pang ye Yesu. 30Bong ye kene yo ipa a ila ye in nga, ngan ikamata kokor ke eng tani maimai leu, le nga itattadai, inbe kotorbe kasin pang ran lono. Yo ngan le taun koonoo palbe pang Yesu. Iyei ne, “Atoo, Tool Mai, kulonau!”

31Motong la palbe leu be Yesu iro baene du ikauu a iyitmaki, inbe iwete panga. Iyei ne, “Ong i kutara lom medana pau mai mata tiap sa! Nga yelei, a le be lom rru nga?”

32Ye kene yo yaru tila a tiyiri lo ookoo lono ye in nga, ngan le eng mai tani in imata. 33Motong la Yesu di galiunu yo tiyepe ookoo lono nga, ngan tisung panga. Tiyei ne, “Moolmool yege, ong i Maro Natunu moolmool sa.”

34Motong la tipie siut a tila, ngan le la tisolo ye malala atu yo ene Genesaret i. 35Yeisa be di tooltool ke malala tani ngan tikilala Yesu, motong tiwanga pang di tooltool ke malala kapala yo iken potai pang ye malala tani nga le imot. Le nga di tooltool tina ngan tikap di tooltool kidi yo matamatenge ikap di nga, ngan a timan pang ye Yesu. 36Timan, motong la timangmang ye be imalum a di tooltool yo matamatenge ikap di nga, ngan tipas le titoko sousoungu matana ki leu, a be nen ngan matamatenge kidi imot. Ngan nen le di tooltool yo titoka nga, ngan tinidi dook mata mulu.

Rau Ke Maro

© Wycliffe Bible Translators, Inc. All rights reserved

More Info | Version Index