Dritarja e kërkimit

Matiu 15

Ger Ke Maro Illoso Noonoongoo Ke Di Sasa Kiidi

(Maka 7:1-13)

1Ye kene tani in di Paresi pattu tiye di pannoongoo ke ger ke Maro, ngan tipa ke Yerusalem a timan pang ye Yesu man titoru. Tiyei ne, 2“Ai, nga yelei a di galium nga titoo dada kidi sasa kiam tiap nga? Kumata, di ngo titoo momo kiam ke ngasingi baede a tingas baedi muku lo ngan be tikan so, ngan tiap!”

3Motong la iraua betanga kidi nen, “Nga yelei a karautoo ger ke Maro, inbe katoo momo kidi sasa kiang ang tapmim nga? 4Awete nen nga, yesoo Maro iwete nen, ‘Kuraua pang tamam le tinam a kulongo betanga kidi.’- Inbe iwete mulu nen, ‘Be tool iwete betanga dook tiap a be igarungu tamana too tinana ye nga, ngan karaumate a imata.’- 5Bong ang nga dada kiang yo kapatomonai di tooltool ye i, in nen. Kumata le tool atu in pat le so ki be ilono tamana too tinana ye, bong iwete pang di nen, ‘So kiau yo be alonang ye a kakap yau nga, ngan awetekala a akap ye lo ponana kiau pang Maro oo,’ 6ngan kumata be iyei nen nga, ngan ang nga kawete be tool tani in ke be ipamulu so tina ye Maro inbe ilono tamana too tinana ye tiap. Le ye dada kiang yo kayeii nen i, in ang nga katoo momo kiang ang tapmim, inbe karautoo betanga ke Maro ye. 7Ang nga tooltool ke kaplungunu sa! Le betanga ke Maro yo muku ngan ikap pang Esai a iwetewete yang nga, ngan moolmool sa. Ngan betanga tina ngan iwete nen,

8‘Di tooltool nga tiyitmaka ek ye koodi pono leu,

bong lodi yo be pau nga, ngan iken manga mooloo yau.

9Di ngan tiwete be tipatomonai di tooltool ye betanga ke Maro yo moolmool i,

bong tiap, tipatomonai di tooltool ye dada le momo yo ke di sasa kidi nga leu.

Ngan la le sungunu kidi yo kanakana ngan tisung pau ye nga, ngan taukan kanono.’-

So Yo Be Iyeie Tooltool Lono Ngan Le Dook Tiap I

(Maka 7:14-23)

10Yesu iwete pang di tooltool maimai tina a imot, motong la ikiu di tooltool malala mai a timan pang ye, inbe iwete pang di. Iyei ne, “Katar talngamim ye betanga kiau i, inbe lomim kaua urata ye. 11So yo be tool ikani ye koonoo a ilo kapono lono i, in ke be igarungu le giri leu ye Maro matana tiap. Bong so yo iken tool lono, lo ngan be ipas ye koonoo a isi in la be igarungu le giri leu ye Maro matana i.”

12Motong la di galiunu timan pang ye man titoru. Tiyei ne, “Ai, nga lom galanga ye di Paresi ngo lapau? Di ngo tilongo betanga kiong yo kuweta i le lodi dook tiap ye sa.”

13Ngan iraua betanga kidi nen, “Tamak yo iyepe ye malala ki ete ni, in so nga le imot yo ipe tiap nga, ngan ole igama di le ipa ye ramidi. 14Le lomim rru ye di pang soo? Sila tikino! Di ngan dawa ben di tooltool mata kis yo be tipatnaia dada pang di diedi nga. Bong awete pang nen, kumata be tool mata kis atu be irara ene mata kis san nga, ngan ole yaru le ru, be timol du gomo lono.”

15Motong la Pita iwete panga nen, “Ole kupagalanga lomam ye kattenge betanga yo kuweta i, in lono ki.”

16Tina Pita iwete nen nga, le nga Yesu itor di nen, “Nga yelei, ang nga o taukamim lo galanga lapau, too? 17Nga yelei, ang nga o ke be kakap tarai betanga tiap, too? Kalongo, so yo be tool ikani ye koonoo a ilo kapono lono i, in ole ipa ye dada ki a idu pang tana. 18Bong so dook tiap la iken tool lono, lo ngan be ipas ye koonoo a isi pang tana i, in la be igarungu tool tani le giri leu ye Maro matana i. 19Le so dook tiap yo awete iken tool lono lo ngan be ipas ye koonoo nga, ngan so nen: lon kap gogo dada dook tiap, inbe iyei dada dook tiap ke raumatenge di tooltool a timmata, inbe iyei bauk, inbe ikapsap ye dada ke kerenge, inbe iyei dada dook tiap ke pinnau, le isopo koonoo ye betanga doko, inbe illung pang di tooltool a igarung edi. 20Le dada dook tiap yo nen nga, ngan la igarungu tool le giri leu ye Maro matana nga. Bong be ingas baene tiap be ikap so a ikan, in ke be igarungu le giri leu ye Maro matana tiap.”

Garup Ke Kenan Itara Lono Medana Pang Yesu

(Maka 7:24-30)

21Yesu iwete pang di galiunu nen a imot, motong la iyege malala tani, inbe ipa le la pombe ye tana mai yo malala mai ru Taia le Saidon iken ye i. 22Motong la garup atu ke Kenan yo ipa ye rara kidi Yuda tiap a iyepe ye ni tani i, in iman pang ye man itang panga, inbe iyei ne, “Tool Mai, ong in Dawiti Natunu. Lom pau! Natuk garup ni so sadi idiwidiwoo a igarungu, le imassingi dook tiap yege.”

23Bong Yesu mala be iwete touo kan betanga siap. Le nga di galiunu timan ye a tiwete panga nen, “Ai, kuwete pang garup ni a ikoo a ila, yesoo ya la itangtang a itoo idi i.”

24Motong la iraua betanga kidi nen, “Au i Tamak iwangau a asi nga pang di tooltool ke Isrel leu. Di ngan dawa ben di sipsip yo taukadi taudi a tilledi nga.”

25Motong la garup tani in ipa le iman potai ye Yesu, inbe igun turunu du kene punu ke dama, inbe iyei ne, “Tool Mai, kulonau!”

26Ngan Yesu iwete panga nen, “Kumata be takap kaningi kidi kakase a takatte muku pang di gaunu be tikan nga, ngan in dada dook tiap.”

27Bong ngan garup tani in iraua betanga ki nen, “Tool Mai, betanga kiong in moolmool. Bong di gaunu nga, ole tikan kaningi moromorana yo imaruru du kookoowoo parmana ke di taudi nga, ngan lapau.”

28Motong la iwete pang garup tani nen, “Garup, kutara lom medana pau mai mata. Le so yo lom be alonong ye i, in ole pombe ben tina yo kuwete nga.” Ye kene yo Yesu iwete nen ye in nga, ngan le pattu leu be natunu garup tani in tinini dook mata mulu.

Yesu Ikarata Di Tooltool Ye Matamatenge Yo Ikap Di Nga

29Yesu iyege ni tani, inbe imadit a ila pang ran koonoo Galili. Motong la ipa a ilo pang kawal atu madini a du iwur a iyepe. 30Motong la di tooltool alunu le alunu kaiye la timan pang ye nga, ngan tikap di tooltool yo kedi dook tiap nga, inbe di tooltool yo matadi kisis nga, inbe di tooltool kapala yo turadi ikalel nga, inbe di tooltool yo medi modo a tiwetewete tiap nga, inbe di tooltool kapala yo matamatenge matana matana ikap di nga, ngan a timan tigaun di Yesu kene punu, inbe ikarata di le tinidi dook mata mulu. 31Ngan nen le di tooltool tina yo man tigaua nga, ngan tikamata di le titakrai ye yo di tooltool yo medi modo ngan tiwetewete mulu; inbe di tooltool yo turadi ikalel nga, ngan dook mata mulu; inbe di tooltool yo kedi dook tiap nga, ngan tipa mulu; inbe di tooltool yo matadi kisis nga, ngan tikamata ni mulu. Le lodi ponana a tiyitmaka Maro kidi Isrel, in ene.

Yesu Ipakan Di Tooltool Alunu Ben 4,000

(Maka 8:1-10)

32Motong la Yesu ikiu di galiunu a man iwete pang di nen, “Au i lok pang di tooltool nga san, yesoo timan a man taye di tayepe nanga ye ke tol oo, le nookoot nga taukadi so yo be tikani i. Bong lok be awete a timagiri pang malala kidi, ngan tipa ye pitolo kidi tiap. Kumata be ayei di nen nga, ngan ole la matadi taltalai ye pitolo kidi dada mai.”

33Motong la di galiunu tiwete panga nen, “Dook mata, bong ni balim koonoo sa. Ole amkap porong le alunu ngai be ampakan di tooltool malala mai nga ye i?”

34Tiwete nen, motong la Yesu itor di nen, “Porong kiang ngan dukumu pi?”

Ngan tiyei ne, “Porong kiam nga dukumu limi be ru, inbe i kiam natnatunu pattu nanga la ikenen nga.”

35Motong la Yesu iwete pang di tooltool budanga mai tina be du tiwur tana. 36Inbe ikap porong limi be ru ngan ipa ye i tina, inbe iwete lo ponana ki pang Maro ye. Motong la itepalapala a isuket pang di galiunu a timalimi di tooltool budanga mai tina ye. 37Ngan di tooltool tina ngan di le imot tikan le kapodi sung dook mata. Motong la Yesu di galiunu tiwinoko kaningi naunu naunu tina yo iken, ngan a tipadid ye karei limi be ru le lo ipon. 38Ngan di tooltool tina yo tigaua a Yesu ipakan di nga, ngan tikinkat di tamoto leu nga, ngan ben 4,000. Bong di garup le di kakase kidi yo tiye di tikan so nga, ngan tikinkat di tiap. 39Yesu itar di tooltool tina a timulumulu pang ye malala kidi kidi, motong la iyiri lo ookoo pono a ila pang ye tana mai san yo iken potai pang ye malala yo ene Magadan i.

Rau Ke Maro

© Wycliffe Bible Translators, Inc. All rights reserved

More Info | Version Index