Dritarja e kërkimit

Rom 1

Paulu Iwete Lo Ponana Ki Pang Di Rom

1Au Paulu awodo rau naii. Ngan au i ayei urata ben kapraingi ke Yesu Kirisi, inbe Maro ya taunu ipootau be ayei aposol a be nen ngan awetewete bingi dook mata ki pang di tooltool. 2Mukot yege ni nga, ngan Maro ipamede betanga ye bingi dook mata tani a iken, le ipaposi pang di Maro koonoo, motong la tiwode ilo ye rau mison ke Maro nga. 3Ngan bingi dook mata tani in iwete ye Natunu. Ya in iyei tool dawa ben idi nga, inbe ipa ye rara yo ke Dawiti i. 4Inbe ye kene yo imadit mulu ye ni ke matenge ye in nga, ngan Maro Amunu Silene ipaposi ben ya in Maro Natunu yo gurana ki mai mata i. Ngan Natunu tani in Yesu Kirisi yo Tool Mai kiidi i. 5Inbe ye urata yo Kirisi iyeii paidi i, in la le Maro lono pau a iyei dada dook mata pau, inbe ipootau be ayei aposol ki ye i. Ngan nen le iwangau be la awetewete bingi dook mata ke Kirisi pang di tooltool yo tipa ye rara kidi Yuda tiap nga, a be nen ngan titara lodi medana panga inbe titoo betanga ki. Inbe Maro ikaua urata tani in pau nga, ngan be nen a ayei di tooltool tina le tiyitmaka Kirisi ene le ilo ete. 6E ang di tooltool yo kayepe malala mai Rom nga, ngan ang ngan Maro ikiu ang be kayei di tooltool ke Yesu Kirisi lapau.

7Ngan rau i awode pang ang di tooltool le imot ke Rom yo Maro lono pang mai san, inbe ipootang panga ya taunu nga. Ngan nen le apatarau nen, be Tamada Maro iye Tool Mai Yesu Kirisi ole lodi pang a tiyei dada dook mata pang, inbe tiyei ang le kayepe ye lo silene kidi.

Paulu Lono Be Ikamata Di Rom

8Kulkulunu be amadit ye wodenge rau i nga, ngan ole awete lo ponana kiau pang Maro yo asung pang i, in ye ang ngan le imot. Le moolmool, au i awete lo ponana kiau panga ye Yesu Kirisi ene, yesoo bingi kiang yo katara lomim medana panga i, in ipa a ingaua ni mai i le imot oo. 9Ngan Maro yo araia lok le imot be ayei urata panga inbe awetewete pang di tooltool ye bingi dook mata ke Natunu i, in lon galanga yau nen, be kanakana ngan au i lok tutang ye pataraungu kiau. 10Inbe ye pataraungu kiau tina nga, ngan atoro Maro be anam mulu be, bong nookoot nga ikarata dada sa pau be amala pang yang. Le kumata be Maro lono dook mata be amala nga, ngan ole mala akamatang pa.

11Ngan apatarau nen nga, yesoo au i lok be le mala akamatang pa, a be nen ngan mala apamedang ye so dook mata yo Maro Amunu Silene ikap sokorai pang ye lo ponana ki nga. Le lok be mala alonang nen, a be nen ngan kakodo le kamede ye lomim medana yo kataru pang Kirisi i. 12Ngan nen le dada yo au lok be tatoo in nen, ang lapau ole kapamedau, a be nen ngan ayang taparlon a tapamedidi atu atu ye lo medana kiidi yo tataru i. 13Ang di diek nga, au i lok be lomim galanga dook nen, lal alunu la lok kaua urata be amala akamatang pa ye nga, bong so kapala pombe a iparamau mai san a atu ye yeingi la le se nookoot nga. Ngan au lok be mala alonang, a be nen ngan urata kiau yo be ayei kataunu yang nga, ngan ole itar kanono dook mata, dawa ben urata kiau yo ayei a itar kanono ye di tooltool kapala yo tipa ye rara kidi Yuda tiap nga.

14Ngan au i, Maro ikaua urata pau be awetewete bingi dook mata pang di tooltool nga le imot. Le akamata ben urata kiau tani in nen, be la awetewete bingi dook mata tani pang di tooltool yo tiwete Girik koodi nga, inbe pang di tooltool yo tiwete Girik koodi tiap nga, ngan lapau. Inbe la awetewete pang di tooltool yo lo galanga kidi mai mata nga, inbe pang di tooltool yo taukadi lo galanga nga, ngan lapau. 15Ngan ye punu in la le au i lok mede mai mata be le mala awetewete bingi dook mata pang ang di tooltool yo kayepe Rom nga, ngan lapau ye i.

Dada Yo Be Tatoo A Be Nen Ngan Tayepe Le Noonoodoo Ye Maro Matana I

16Nen le au i moomook ye bingi dook mata ke Kirisi tiap, yesoo bingi dook mata tani in dada yo be Maro ikap di tooltool a ipamulu di ye so dook tiap yo be igarung di i. Moolmool, in dada tani yo itaru a be nen ngan ye gurana ki yo mai mata in nga, ngan ole ipamulu di tooltool le imot yo titara lodi medana pang Kirisi nga. Kulkulunu ngan ipaposo dada tani in pang di Yuda a ipamulu di ye, inbe nookoot nga ipaposi pang di tooltool yo tipa ye rara kidi Yuda tiap nga, ngan a ipamulu di ye lapau. 17Inbe bingi dook mata tani in iwete paidi ye dada dook mata yo be tatoo nga, ngan Maro ole iyei idi le tayepe ben di tooltool noonoonoo ye matana nga. Ngan dada tani yo be tatoo a be nen ngan tayepe le noonoodoo ye Maro matana in nen, be kanakana ngan tatara lodo medana panga le ikenen leu. Le dawa ben tina yo Rau ke Maro iwete nga, “Tool yo be iyei tool noonoonoo ye matak i, in ole itara lono medana pau le ole iyepe ye yepongo yo ipa ye Maro i.”+

Maro Katen Malmal Pang Di Tooltool Yo Tiyei Noonoo Nga

18Maro ipatnaii be ya in katen malmal pang di tooltool le imot yo tiwala muridi panga nga, inbe pang di tooltool yo titu ye yeingi dada dook tiap nga. Di ngan, ye dada dook tiap kidi yo tiyei nga, ngan tiyakala di tooltool kapala le lodi galanga ye betanga moolmool tiap. Ngan nen le kate malmal ke Maro tani in ipa ye malala ki a isi pombe mallangana be igarung di. 19-20Inbe di tooltool tina lodi galanga ben Maro la iyepe i, yesoo ya taunu ipatnaii pang di ye so yo tikamata ye matadi nga. Moolmool, di tooltool ke be tikamata Maro ye matadi tiap, bong ye kene yo itar so le imot a pompombe ye lang le tana nga, ngan di tooltool tikamata so tina yo itar nga, ngan lodi galanga nen, be ya in gurana ki mai le mai san. Ngan ya in dawa ben so tina yo itar nga tiap, bong ya in Maro tani yo itar di a tiyepe i. Le di tooltool yo tikamata so yo itar nga, ngan ke be tiwete be di ngan lodi galanga ye Maro tiap, ngan tiap

21Le di ngan lodi galanga ben Maro iyepe, bong tiyitmaka ene ben ya in Maro nga tiap, inbe tiwete lo ponana kidi panga tiap lapau. Inbe so yo lodi kaua urata ye mai mata nga, ngan so sokorai yo taukan punu nga. Ngan nen le di ngan lodi sarere ye dada ke Maro yo moolmool nga. 22Inbe di ngan tiwete be di tapdi ngan la di tooltool lo galanga nga, bong tiap, di ngan tiyei ben di tooltool kapakapa yo taukadi lo galanga nga. 23Ngan nen le tiwala muridi pang Maro yo iyepe nen le taukan matenge i. Ya in ene mai san ke be di tooltool tipayiti, bong lodi be tisung panga tiap, le tikarata tomonai so kanningadi dawa ben di tooltool yo ke be timmata nga, inbe di man le asara yo kedi pai nga, inbe di asara kapala yo tikarau ye katedi nga, ngan a tisung pang di.

24Ngan la Maro ilele di tiap, bong iyege di a sila di leu tiyepe, a be nen ngan titoo dada dook tiap ke noonoo yo lodi kaua urata ye nga. Nen le tigarung di tapdi tiye di diedi tinidi ye dada dook tiap ke bauk yo giri leu ye Maro matana nga. 25Di ngan tiwala muridi pang betanga moolmool ke Maro, inbe tila la titoo betanga yo ke kaplungunu nga. Nen le lodi be tisung pang Maro yo itar so nga le imot, in tiap, bong tisung inbe tikau urata pang so tina yo Maro itar di nga. Di ngan tiyei nen, bong lod galanga nen, be tool tani yo itar so tina nga i, in ya la ene mai ke be tayitmaki le ikenen leu le taukan motingi i. Moolmool.

26Ngan tina yo tiyei nen nga, ngan la le Maro ilele di tiap, bong iyege di a sila di leu tiyepe, a be nen ngan titoo dada dook tiap ke tana yo tinidi iyolo di be la tiyei nga. Ngan so yo tiyei nga, ngan dook tiap le dook tiap ki taunu le ke be moomoodi ye. Nen le di garup kidi timot ye dada dook mata yo be tiye di niditooroo tiken ye i, inbe tila a la tiye di diedi garup kapala tiken ye dada ke kerenge. 27Inbe gaongo leu, di tamoto kidi ngan lapau timot ye dada dook mata yo be tiye di rimadi tiken ye i, inbe tinidi iyolo di mai san be tila ye di diede tamoto kapala la tiye di tiken ye dada yo ke kerenge i. Ngan di tamoto tina tiye di diede tamoto kapala tiyei gogodi nen nga, le tikapsap ye dada dook tiap ke bauk yo ke be moomoodoo ye nga. Ngan nen le urata masngana pompombe pang ye di, le ole tisolo le lo iye noonoo kidi tina ngan kootoonoo.

28Inbe nangan leu tiap, bong di ngan lodi tar be betanga moolmool yo ke Maro, in so sokorai, le lodi panga tiap. Nen le Maro ilele di tiap, bong iyege di a sila di leu tiyepe, a be nen ngan titoo dada dook tiap yo di tapdi lodi kaua urata ye nga, ngan leu, inbe tiyei dada dook tiap yo Maro iwete be tiyei be nga. 29Di ngan, dada dook tiap matana matana ngan ipon ye di. Le kanakana ngan tiyei dada dook tiap ke noonoo, inbe tiyei dada dook tiap pang di tooltool a tigarung di ye, inbe dada dook tiap yo ke matadi so in iso pang di, inbe tikap urata masngana pang di tooltool kapala. Inbe di ngan matadi gorengana ye so kidi diedi a lodi dook tiap pang di, inbe tiraumatamata di tooltool a timmata, inbe tiwete betanga yo ke kate malmal nga, inbe tikap lungunu ye di tooltool. Inbe di ngan tipasa mur ye di tooltool, 30inbe tillung pang di diedi a tigarung edi, inbe tiyepe ben koi ke Maro, inbe di ngan lodi dook tiap pang di tooltool kapala a tigarung di ye betanga, inbe di tapdi koodi payit di be ede maimai ye di tooltool kapala. Inbe kanakana ngan lodi kap gogo dada paunu be tiyei soo so yo dook tiap nga, inbe tisak betanga kidi tamadi le tinadi. 31Inbe di ngan taukadi lo galanga dawa ben di tooltool kapakapa, inbe betanga kidi yo tiwete ngan sa yo be titoo dook le imot nga tiap, inbe taukadi lodi yo dook mata pang di tooltool kapala nga, inbe di ngan lodi mulumulu ye di tooltool kapala a tilon di, ngan tiap lapau. 32Ngan Maro itoo dada dook mata ki yo noonoonoo i, a itara betanga medana atu ye di tooltool ke yeingi dada dook tiap yo nen nga. Le betanga medana ki tani in nen, di tooltool yo tiyei dada dook tiap nga, ngan dook mata be timmata a tilledi. Ngan di tooltool tina ngan lodi galanga ye oo, bong tisootoo yeingi dada dook tiap kidi tina, inbe di ngan lodi ponana ye di tooltool kapala yo tiyei dada dook tiap ben di, ngan lapau.

Rau Ke Maro

© Wycliffe Bible Translators, Inc. All rights reserved

More Info | Version Index