Dritarja e kërkimit

KELUAREN 21

Hak-hak budak

(Ul. 15:12-18)

1“Berekenlah man kalak Israel undang-undang enda: 2Adi itukurndu sekalak budak kalak Heber, maka arus ia erdahin ras kam enem tahun dekahna. I bas tahun si pepituken, arus ia ibebasken, alu la nggalar kai pe. 3Adi langa ia erjabu tupung ibuatndu ia jadi budakndu, e maka sanga ia ibebasken pe la banci ibabana ndeharana; tapi adi enggo ia erjabu tupung ibuatndu jadi budakndu, banci ibabana ndeharana e lawes. 4Adi tuanna mereken sekalak ndehara man bana, jenari tubuh i bas ia nari anak-anak dilaki ntah diberu, ndeharana ndai ras anak-anakna e tuanna empuna, janah budak si dilaki ndai ngenca bebas lawes. 5Tapi adi ikataken budak ndai maka keleng atena man tuanna, man ndeharana ras man anak-anakna janah la atena ibebasken, 6e maka arus ibaba tuanna ia ku ingan persembahen. I je tuanna nuruh ia tertande ku pintun ntah pe ku tiang pintun jenari itupukna cupingna. Kenca bage ia enggo lalap jadi budak tuanna.

7Adi sekalak perbapan ndayaken anakna si diberu jadi budak, budak si diberu e la banci ibebasken bagi budak-budak si dilaki. 8Adi anak si diberu idayaken gelah ia jadi ndehara kalak si nukursa e, jenari lanai ate si nukursa ndai ngena, e maka ia arus idayaken mulihken man bapana ndai; la banci idayaken tuanna ia man kalak pertandang, sabap adi bage la bujur perbahanen tuanna e man budakna e. 9Adi sekalak perbapan nukur sekalak budak diberu jenari iberekenna man anakna si dilaki, la banci la ipeserina ia ras anakna si diberu. 10Adi sekalak dilaki empo pedua kaliken, hak ndeharana si pemena tetap seri ras si gelgel, janah arus iberekenna man bana nakan ras uis asa si gelgel buena. 11Adi la tersehisa tanggung jawab enda kerina man ndeharana sintua ndai, arus ibebaskenna ndeharana sintua e alu la ngaloken galar kai-kai pe.”

Undang-undang kerna kalak si pekpeken

12“Ise si mekpek kalak si deban seh mate, ia arus ibunuh. 13Tapi adi kalak ndai terpekpeksa alu la iarapna, janah labo isengajakenna munuh, banci ia lompat ku sada ingan si Kutentuken man bandu, janah i je ia enggo aman. 14Tapi adi sekalak jelma merawa janah alu sengaja munuh kalak si deban, ia arus ibunuh, aminna gia ia enggo kiam cebuni ku batar-batarKu.

15Ise si mekpek bapana ntah nandena, ia arus ibunuh.

16Ise si enculik kalak si deban guna idayaken ntah pe ijadikenna jadi budakna sendiri, kalak si bage arus ibunuh.

17Ise si numpahi bapana ntah nandena, ia arus ibunuh.

18Adi lit kalak rubati, jenari sekalak mekpek imbangna alu batu ntah alu tinju-tinjuna, tapi la mate ibanna, ia la banci iukum. Adi kalak si kena pekpek ndai terpaksa ampar i bas inganna medem, 19tapi kedungenna ia erdalin ndarat alu erciken-ciken, e maka kalak si mekpeksa ndai arus nggalari wari-wari kidekah ia la ngasup erdahin e, janah arus ipekena-kenana ia seh malem.

20Adi lit kalak si mekpek budakna dilaki ntah diberu, jenari budak ndai minter mate i je, tuanna arus iukum. 21Tapi adi budak ndai mate kenca sada ntah dua wari, tuanna e la iukum. Ertana si bene e saja pe, e me budakna e, enggo cukup jadi ukumenna.

22Adi lit piga-piga kalak dilaki rubati jenari terpekpeksa sekalak diberu si sangana mehuli kulana erbahanca diberu ndai keguguren, tapi la lit luka-lukana si deban, kalak si mekpeksa ndai la banci la idenda asa si ipindo perbulangen diberu ndai, rikutken persetujun hakim. 23Tapi adi diberu ndai pe luka, ukumenna e me kap: kesah ganti kesah, 24mata ganti mata, ipen ganti ipen, tan ganti tan, nahe ganti nahe, 25si meseng ganti si meseng, luka ganti luka, bekas megusgus ganti bekas megusgus.

26Adi lit kalak si mekpek mata budakna dilaki ntah diberu janah erkiteken si e ceda mata budakna ndai, arus ibebaskenna budakna e selaku galar matana ndai. 27Adi ipekpekna budakna seh ndabuh ipenna, arus ibebaskenna budakna e selaku galar ipenna si naktak ndai.”

Tanggung jawab si empu barang

28“Adi sada lembu ngegas sekalak jelma seh mate, lembu si ngegassa ndai arus ibenteri alu batu seh mate, janah dagingna la banci ipan; tapi empu lembu ndai la iukum. 29Tapi adi lembu ndai enggo biasa ngayak-ngayak kalak janah empuna enggo ipersingeti kerna si e, tapi la ijagana lembuna e, e maka adi iegasna kalak seh mate, lembu ndai ibenteri salu batu, janah empuna pe arus ibunuh. 30Amin bage gia, adi empu lembu ndai ibere nggalar nebusi kesahna gelah ola ia mate, la banci la igalarina asa si itentuken. 31Adi lembu ndai ngegas sekalak anak-anak dilaki ntah diberu, peraturenna bali ka nge. 32Adi lembu ndai ngegas sekalak budak dilaki ntah diberu, empu lembu ndai arus nggalar man si empu budak e asa erga pasaren budak, telu puluh duit pirak, jenari lembu ndai ibenteri alu batu seh mate.

33Adi lit kalak si ngagui tutup sumur ntah pe adi ikalina sumur tapi la ibahanna tutupna, jenari adi lit sada lembu ntah pe kelede ndabuh ku bas sumur e, 34arus igalarina lembu ntah kelede ndai. Duitna igalarkenna man empuna, janah asuh-asuhen si mate e banci man bana. 35Adi lit sada lembu ngegas lembu kalak si deban seh mate, empu lembu ndai duana arus ndayaken lembu si nggeluh e, janah duitna ibagiken; daging lembu si mate ndai pe arus ibagi duakenna. 36Tapi adi lembu ndai enggo rusur ngegas janah la ijagai empuna, la banci la igantina lembu si mate ndai alu mereken sada lembu nggeluh man kalak sisada nari ndai, tapi lembu si mate e banci man bana.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index