Dritarja e kërkimit

Leviticus 25

Allrakut Malrunelgat

1Atanrem qanrutaa Moses-aaq Ingrimi Sinai-ami alerqurluku 2makut picirkiutet qanrutkesqelluki Israel-aam yuinun. “Cikiuteklemnun nunamun tekiskuvci nuna arulaingqavkalarciqerci allrakut malrunelgatni camek nauceciivkenaci. 3Arvinlegni allrakuni nauceciiniartuci naucetaarvigpecen̄i naungigcarluki-llu wine-arkanek naucetaaci, quyurciaqluci pinariaqan naucetaavci naugillritnek. 4Tau͡gaam malrunelgatni allrakut arulairumavkalarciqerci nuna, allakarluku allrakuq Atanermun. Nauceciiyaqunaci wall'u naungigcarluki wine-arkanek naucetaaci. 5Ellmeggnek-llu naulriit avuryaqunaciki, wine-arkat-llu atsat avurpek'naki; allrakuq tauna arulairumallerkaqaa nunam. 6Nunam naungigcaumanrilnge'rmi neqkangqerceciiqaaci, elpet, teguaten, arnat angutet-llu calisteten, allanret-llu nunavcen̄i uitalriit. 7Cali-llu kuluvautevci ungungssiutevci-llu neqkautekarkauluki. Cat tamalkuita tamaani naulriit neryugngaciqaci.

Uterceciyaraq Allrakuq

8“Naaqiluci malrunelgen malrunlerqunek naaqutekluku (7x7) allrakunek, quyurrluteng yuinaak malruk qulngunrita'arnek cipluku (49) allrakunek amllertaluteng. 9Nutaan-llu iralut malrunelgat ernengkan qulnek, Erenrani Assiilnguut Au͡gautekaata, ayagceciniartuci cupu'uryarakun cupuralriamek nunami tamiini. 10Tuaten pillerpeciuggun allrakuq yuinaak malruk qulmek cipluku (50) allakarciqerci pegciyaraurrluku yuinek nunam. Taumi allrakumi yuum tunellni akilirtelluku uterceciiqaa pikestellranun wall'u kinguvrinun, kina-llu imna tunumallrukuni teguarurrluni nakmiin ilaminun utertarkauluni. 11Tauna allrakut yuinaak malruk qulmek cipnengutiit (50) angnirnaqluni jubilee-ruluni piciryarauciquq elpecen̄un. Taum nalliini nauceciingaituci wall'u avurngaunaki ellmeggnek naullret wall'u avurngaunaci wine-arkanek napat atsaitnek. 12Tauna allrakuq Jubilee-ruan; kencignarqerkauluni elpecen̄un. Tuani-llu nerlararkauluci kiingita nunam naugillrinek.

13“Uum allrakuani agayunerpiim Jubilee-m tamarpeci utertarkauguci piutevcen̄un. 14Camek-llu tun'ikuvet nunalgutevnun wall'u camek kipukengkuvet teglegingnaqluten pingaituten. 15Akikiularniaci kiputarkaci allrakut cuqluki amllertaciit nunam naugillerkai agayunerpak Jubilee tekitenqiggnatkaanun. 16Allrakut amllerqata akia mayuqaniraqluku, allrakut-llu ikgetaqata ikeglicaraqluku, nunam naugillerkaa cuqluku tuneniaqumiin. 17Teglegissaaksaunaki ilaci, tau͡gaam qigcikarkaugarci Ataneq Agayutsi.

18“Taumek niisngaarkaugaci alerquutenka picirkiutenka-llu aturluki alingniuqsaunaci uitaniartuci nunami. 19Nuna naunrarnek naugiciquq camirrluci-llu nerlararkauguci uitanqegciluci-llu tamaani uitaarkauluci.

20“Waten-llu qanquvci, ‘Camek ner'arkauceta malrunelgatni allrakut nauceciiksailkumta wall'u quyurciksaunata naugillrinek?’ 21Wiinga atawaqerceciiqamci arvinelgatni allrakut, nuna naugivkarluku neqkanernek allrakuni pingayuni. 22Nauceciikuvci allrakut pingayunelgatni cali nerlarciquci allrakut arvinelgatni quyurcillerpecen̄ek, nurusngaunateng-llu quyurcinatkarpecen̄un allrakut qulngunritariitni.

Yuut Piitnek Utercecillerkaq

23“Nuna taqluku tunumaarkaunrituq, elpeci pikenrilavciu; Agayutem pikaa. Elpeci allanertun ayuquci nunamek navricimalriatun.

24“Tamaitni-llu nunani piksagutellerpecen̄i nallunairumaarkauguq piyunarquciliumaluni nunam pikestellran ataam kipucugngaarkauluku. 25Ilasi arrsaureskuni, ilii-llu nunautmi tunluku, canimenaku tungayiin ataam kiputarkaugaa nuna tunellra. 26Tauna-llu angun canimenaku tungayailkuni nunam ataam kiputestekaanek, ellii pitsaqevkenani tukuureskuni nunautni ataam kipucugngariluku, 27elliin cuqtarkaugai allrakut amllertaciit tunrraanerminek, nutaan-llu akian ilii utercetarkauluku kiputestellranun cuqekluki allrakut uitaqalriit agayunerpaunqigtellerkaanun Jubilee-ruluni. 28Tau͡gken aipaagni ataam kiputesciigalkuniu, tunellra uitaurararkauguq kiputestiini engelkarrluku allrakua agayunerpiim Jubilee-m; taum nalliini pegcimaarkauluni. Elliin-llu ataam piksagutarkauluku.

29“Kina-llu imna tuneniaquni enemek avaciumalriami qacarnermek nunarpagmi, ataam kipucugngaa. Tunllerminek ayagluku allrakurnatkaanun ena tunellni kipucugngaciqaa. 30Tau͡gken ataam kiputenrilkuniu tuani allrakumi, tua-i tauna ena iluanelnguq qacarnelegmi nunarpagmi taum kiputestekellran kinguvrin-llu piksagutarkaugaat; angicimangaunani pikesteklerminun agayunerpiim Jubilee-m nalliini. 31Tau͡gken enet nunacuarni qacarnerilngurni ayuqeciqut carr'ilqatun; ataam kipucimayugngaluteng, angicimaarkauluteng agayunerpiim Jubilee-m nalliini. 32Tau͡gaam Levite-at nunarpagni elkaringavimeggni ataam kipucugngalarciqait tuneniaqelteng. 33Iliita-llu Levite-at atunrilkatgu ataam kiputellerkaa enem, tauna ena angicimaarkauguq pikestellranun agayunerpagmi Jubilee-mi, tua-i-wa enet pikarkaungatki nakmiillaqluki Israel-aat nunaitni. 34Tau͡gaam nuna ungungssiutet nerlarviat Levite-at nunarpaita avataitni uitalriit tuneniaqumangaitut, akwarpak ellaita pikngatki.

Navriutet Arrsaulrianun

35“Pitangqerkan Israelite-amek mallgeskevni uitalria arrsaureskan ellminek angumasciigaliluni, ikayuaciqan aulukluku allanrulriatun pitarrluku, mallgeskevnek ayanritniartuq. 36Akim ilangutketukiinek akilicivkarngaitan, tau͡gaam qigcikiu Agayuten. Tua-i Israelite-aullguten mallgeskevni uitaurtelluku. 37Akiilngirceskuvgu ilangaitan akilillerkaa wall'u tun'ikuvet elliinun neqkanek akingutkengnaqluki pingaitaten. 38Wiinga Ataneq Agayutkarpecia, Egypt-aamek anutellruamci cikirnaluci Canaan-aam nuniinek Agayutkesqellua elpecen̄un.

Teguat Pistet Pegcimallerkaat

39“Kina Israelite-aq arrsaurrluni elpenun kiputeskan pistekngaitan teguatun. 40Elpenciiquq calistetun ayuqluni allanertun-llu. Caliarkauguq elpeni engelkarrluku allrakua agayunerpiim Jubilee-m. 41Taum nalliini uniciiqaaten irniartuumarmi, uterrluni ilaminun ciuliami-llu nunautiinun. 42Israel-aam yui wiinga kevgaqngamki, anutellruluki Egypt-aamek; taumek tuneniaqumangaitut teguaruarkauluteng. 43Qigcigyugluten Agayutevnek mulngakluki pilarciquten. 44Teguaqluki pistekarpecen̄ek piyukuvci kipuskici avaqlirpecen̄ek atanruvignek. 45Cali-llu kipucugngauci allanret irniaritnek nunavcen̄i uitalrianek, tamakut-llu irniarit yuurtellret nunautevni elpet piksagucugngaluki. 46Paitaqevkaryugngaaten-llu irniarpenun, ellaita piksagutarkauluki akwarpak. Teguaqluki pistekciqaten, tau͡gaam ilaten Israel-aat mulngakluki piarkaugaten.

47“Tua-llu pitsaqevkenani allanrulria nunavcen̄i tukuureskan ilasi-llu Israel-aaq arrsaurrluni, tunluni-llu ellminek taumun allanermun wall'u yuin iliitnun. 48Kipucimallermi kinguani utermun kipucimayugngaciquq. Anelgutain iliita, 49wall'u angiin wall'u ataatiin, tungayiin wall'u canimenaku tungelqurran utermun kipucugngaa; wall'u ellii ellminek akikangkuni ellminek akiliulluni angicimayugngaluni. 50Kiputestellni aipaqluku cuqtarkaugakek allrakut elliinun tunrraanerminek agayunerpaullerkaanun Jubilee-ruluni, taukut-llu allrakut cuqekluki angicimallerkani akilirarkauluku. 51-52Akiliutekellran ilii utercetarkaugaa cuqluki allrakut agayunerpaullerkaanun Jubilee-ruluni, 53calistetun akingluni allrakumi pilriacetun piluku. Kiputestellran-llu mulngakluku piarkauluku. 54Makutgun qanrutkumallerteggun angicimanrilkuni pegcimaarkauguq irniani ilakluki allrakuani agayunerpiim Jubilee-m. 55Israel-aam yui taqluteng kevgaularngaitut. Ellait kevgaqanka, anutellrenka Egypt-aamek. Wiinga Atanruunga elpeci Agayutkarpecia.”

Yupik Bible

Yupik Bible © 2012 American Bible Society

More Info | Version Index