Dritarja e kërkimit

Levitikus 11

Gamanman ni yira Kay

(Deuteronomy 14:3–21)

1Me pi’ SOMOL e pi gafal ni ba’aray ngak Moses nge Aron 2ni fan ngak e girdi’ nu Israel. Ni demturug e mit i gamanman nu arow mra yag nim ked 3ni tin nib dar buguli ay, ma makunuy gan ngalan k’angan nga fin i yengyeng, 4-6machane thingar dab mu longuyed e kamel, rockbadger, ara rabbit. Thingar mu ted e mitney e gamanman nib ta’ay; yad ma kunuy garad ngalan k’anganrad, ma de dar buguli ayrad. 7Ma dab mu longuyed e babiy. Thingar mu ted nib ta’ay; ya ba madar buguli ay ma der ma kunuy gan ngalan k’angan fini yengyeng. 8Dab mu longuyed e pi gamanman ney fa mmathgad nga reb e pin’ey nike yim; ya yad ba ta’ay.

9Demturug e mit i nig nu mday fu mran ni bay fen e mnong rok nge olyen ma gimed ra kay. 10Machane gubin mit ban’en nu mday ngu mran ndariy fen e mnong rok nge olyen e thingar dab mu ked. 11Mitney e yafos e thingar mu ted nib ta’ay. Thingar dab mu ked fa mmathgad ngak reb ni ba yam’. 12Thingar dab mu koyed ban’en nib fos nma par u mday ara mran ndariy fen e mnong rok fa olyen.

13Ma tin ba’aray u fithik’ e arche’ e dab mu ked ya ba ta’ay, ni aram e arche’ ni: eagle, vulture, osprey, 14buzzard, kite, falcon ni demtrug ko mit ni ngan riy, 15nge urngin mit e gapluw, 16ostrich, nighthawk, seagull, hawk ni demtrug ko mitin ngan riy, 17owl, cormorant, ibis 18nimen nu maran, pelican, carrion vulture, 19stork, heron ni demtrug ko mitin ngan riy, hoopoe nge magl’aw.

20Urngin e pi chachangeg ni bay porad e ba ta’ay, 21kemus ni tin ma tim’og riy e de ta’ay. 22Rayag ni ngam ked e locust, cricket, nge asamaning. 23Ma urngin mit ban’en nib achichig ni bay pon ma aningeg ay e thingar mu ted nib ta’ay.

24Pin’ey e ra ta’ay nagmed; ni en nra math ngak reb nike yim’ e ra par nib alit nge mada’ ko blayal’, 25ma en nra fek bang u downgin reb e pin’ey e thangri luknag e mad rok me par nib ta’ay nge mada’ ko blayal’. 26Urngin e gamanman nib madar buguli ay ma dar ma kunuy gan ngalan k’angan ngaf ni i yengyeng e ra ta’ay nagmed; ma pi’in ra math ngak reb e pi gamanman ney e ra ta’ay. 27Ma urngin e gamanman nma yan nma math ga’ngin yang i lan ay nga but’ ni mayan nga aningeg raba’ i ay ni bod e pilis nge gatuw, e ra ta’ay nagmed; ma en nra math nga downgin bagyad nike yim’ e ra par nib ta’ay nge mada’ ko blayal’, 28ma cha’ ni fek e reb e pin’ey e thangri luknag e mad rok me par nib ta’ay nge mada’ ko blayal’; pin’em e ra ta’ay nagmed.

29Ba’aray e pi graraw nra ta’ay nagmed u roy u fayleng: weasel, boro’, nge galuf, 30adburru’, gayuch, atilgog, athlowo’, nge atraw’. 31En nra math nga reb nike yim’ e ra par nib ta’ay nge mada’ ko blayal’. 32Ma fa’anra mul reb nike yim’ nga daken demturug ban’en, ma fare n’en e ra ta’ay. Ndemturug ko bochyang i plang, fa mad, fa keru’ e gamanman, fa tutuw, ni demturug ko mang e yima fanay ngay, ma thingar ni chultheg fare n’en nga maran, machane ra par nib ta’ay nge mada’ ko blayal’. 33Ma fa’anra ra mul reb nike yim’ nga daken ba th’ib nni ngongliy ko but’, ma urngin e tin bay u langgin fare th’ib mra ta’ay, ma fare th’ib e thingar ni bilig. 34Ma rachey ni map’ ranggin e re th’ib ney nga daken ba ggan, ma fare ggan e ra ta’ay, ma tin yima unum riy e ku ra ta’ay. 35Demturug ban’en nra mul reb fa pin’en nike yim’ nga daken ma ra ta’ay; ra ba stof fa ba oven ma ngan blig. 36Machane ba alublub fa ba tafen e ran e ra par nib be’ech, ni yug aram rogon ni demturug ban’en nra math nga reb e pin’em nike yim’ me ta’ay. 37Ma fa’anra mul reb e pin’em nike yim’ nga daken e awoch ni yibe n’en ni ngan yung, ma fare awoch e ku ra par nib be’ech. 38Machane fa’ara kan tay fapi awoch nga mran me mul reb e pin’ey nike yim’ nga daken, ma fare awoch e ra ta’ay.

39Fa’anra yim’ reb e gamanman ni yima longuy, ma en nra math ngay e ra par nib ta’ay nge mada’ ko blayal’. 40Ma fa’anra kay be’ bang ko fare gamanman, ma thangri luknag e mad rok, me ra par nib alit nge mada’ ko blayal’; en nra fek fare gamanman nike yim e thangri luknag e mad rok, me ra par nib ta’ay nge mada’ ko blayal’.

41Thingar dab mu longuyed e pi gamanman nib achig nma yan u daken e but’, 42ndemturug ko ma gararaw, fa ma yan nga ay ni aningeg raba’, fa ba yo’or raba’ i ay. 43Dab mu ta’ay niged gimed u reb e pin’ey ni ngam longyed. 44I Gag SOMOL ni Got romed, ere thingar mu ted gimed ni gimed ba tabgul, ni bochan e gub thothup.- 45Ya Gag SOMOL e gu fekmed nga wuru’ yu Egypt ya nge yag ni nggu mang Got romed. Thingar mu thothupgad, ya gub thothup.

46Irera’ e pi gafal ni murung’agen e pi gamanman nge pi arche’, nge urngin e pin’en nma par u mday ngu mran, nge urngin e tin ma yan u daken e but’. 47Thingar mu sas’alukgad i ki’eg e tin nib tabgul ko tin nib ta’ay, nge tin e gamanman ni yira kay nge tin ndab ni kay.

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index