Dritarja e kërkimit

Numbers 7

Maligach rok e pi mitethin

1Rofen ni mu’ Moses i n’uf ngalang fare Tent u p’eowchen SOMOL me liyef ko gapgep nge urngin e pin’en ni bay u langgin nib mu’un fare altar nge urngin e tatalin e maruwel riy ngay, ni aram e ke pi’ ngak SOMOL ni gubin. 2Ma fapi mitethin ko fa yuke girdi’ ni yad e pi tayugang’ ko fapi ganong nu Israel, ni fapi pumo’on ni ur mathe’eg girdi’gad, 3e rfeked e pi maligach rorad i yib ngak SOMOL: ni nel’ e wagon nge ragag nge l’agruw e garbaw ni pumo’on, ra l’agruw i yad fapi tagugang’ ma reb e wagon, ma ra taabagayad ma reb e garbaw ni pumo’on. Nga tomuren ni kar pi’ed e pin’em, 4me ga’ar SOMOL ngak Moses, 5“Mu fek e pi tow’ath ney ngam fanay ko maruwel ni ngan tay ko fare Tent; mu f’oth u daken e pi Levite nib m’ag nga rogon e maruwel ni ngar ngongliyed.” 6Ere pi’ Moses fapi wagon nge fapi garbaw ni pumo’on ngak e pi Levite. 7Me pi’ l’agruw e wagon nge aningeg e garbaw ni pumo’on ngak e pi girdi’ rok Gershon, 8ma aningeg e wagon nge meruk e garbaw ni pumo’on ngak e girdi’ ni owchen Merari. Urngin e pi maruwel ni ngu’ur ngongliyed me Ithamar nib mo’on ni fak Aron e ngi i yog rogon ngorad. 9Machane de pi’ Moses reb e wagon ara reb e garbaw ngak e girdi’ ni owchen Kohath, ni bochan e tin thothup ni yad ma ayweg e ngu’ur feked u daken porad.

10Fapi tayugang’ e ku ra feked e maligach i yib ni fan ko madnom ko fare altar ni ngan yiblay. Nap’an nra fal’eged rogorad ni ngar pi’ed e pi tow’ath rorad u altar, 11me ga’ar SOMOL ngak Moses, “Mog ngorad ngar pi’ed e tow’ath rorad nra reb e rran u lan fa ragag nge l’agruw i rran ni ngan madnomnag fare altar riy, me bagyad fapi tayugang’ me pi’ e tirok e tow’ath.”

12-83Ba’aray yarmen e maligach nra pi’ed:

Rran Ganong Mitethin
som’on Judah Nahshon nib mo’on ni fak Amminadab
l’agruw Issakar Nethanel nib mo’on ni fak Zuar
dalip Zebulun Eliab nib mo’on ni fak Helon
aningeg Ruben Elizur nib mo’on ni fak Shedeur
lal Simeon Shelumiel nib mo’on ni fak Zurishaddai
nel’ Gad Eliasaf nib mo’on ni fak Deuel
medlip Efraim Elishama nib mo’on ni fak Ammihud
meruk Manasseh Gamaliel nib mo’on ni fak Pedahzur
mereb Benjamin Abidan nib mo’on ni fak Gideoni
ragag Dan Ahiezer nib mo’on ni fak Ammishaddai
ragag nge
ta’reb Asher Pagiel nib mo’on ni fak Okran
ragag nge
l’agruw Naftali Ahira nib mo’on ni fak Enan

Fapi maligach nra feked i yib e go’ ta’reb rogon: bochi dabiy nib silber ni malngin e wugem e ounce nge bochi taray nib silber ni malngin e guyey e ounce, ni bod rogon ni kan turguy e ngiyal’nem, galin’em ni l’agruw e ba sug ko flour ni kan aruy ko gapgep ni fen e maligach ni grain; nge barba’ i plet nib gol ni malngin e aningeg e ounce, nib sug ko incense, nge reb e fak e garbaw ni pumo’on, nge reb e saf ni pumo’on, nge reb e saf ni ta’reb e duw yangren, ni fen fare maligach ni mo’oruf; nge reb e kaming ni fen fare maligach ko denen; nge l’agruw e garbaw ni pumo’on, nge lal e saf ni pumo’on, nge lal e kaming, nge lal e pifak e saf ni ta’reb e duw yangarad, ni fen fare maligach nma gapaseg thilin Got nge girdi’.

84-88Ba’aray urngin fapi maligach ni fek fa ragag nge l’agruw i mitethin i yib ni ngan fanay ko madnom ko fare altar ni ngan yiblay:

•ragag nge l’agruw raba’ e dabiy ni silber, nge ragag nge l’agruw raba’ e taray ni silber, ni tomalngin e pin’ey u gubin e nel’ i ragag e pawn

•ragag nge l’agruw raba’ e plet ni gol ni aningeg i ragag nge meruk e ounce tomalngin u gubin, nib sug ko incense

•ragag nge l’agruw e garbaw ni pumo’on, nge ragag nge l’agruw e saf ni pumo’on, nge ragag nge l’agruw e pifak e saf ni ta’reb e duw yangarad, ni ku bmu’un fapi maligach ni grain ngay ni yigagen ni fen e pi maligach ni mo’oruf

•ragag nge l’agruw e kaming ni maligach ni fan ko denen

•rliw’ nge aningeg e garbaw ni pumo’on, nge nel’ i ragag e saf ni pumo’on, nge nel’ i ragag e kaming, nge nel’ i ragag e fak e saf nike gaman reb e duw yangarad, ni tiney e fen fare maligach nma gapaseg thilin Got nge girdi’.

89Nap’an ni yan Moses ngalan fare Tent ni nge non ngak SOMOL, me rung’ag laman SOMOL ni be non ngak u daken upongen fare Kahol ko M’ag, u thilin fa gali kerubim.+

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index